Baki sab Theek hai…

The following are the experiences I have heard from numerous people, they are not figment of my imagination…….

Poojya Pradhan Mantriji

Namaskar.

Main ek aam hindustani hoon jo roj mehnat karke apna ghar sambhal raha hoon. Pichle mahine hi ghar ke ek sadasya ka mediclaim reject ho gaya, aapke IRDA ke paas bhi gaya, lekin kuch fayada nahin huwa. Ab doston se aur rishtedaaron se paise udhar leke hospital ka bill chukaya hai. Woh roj mujhse paise maang rahe hai. Kuch logg to naaraj bhi ho gaye hai. Baaki sab thik hai.

Bijli company ne rate badha diya. Bill pe likhke beja hai, pehle paise bharo phir complain karo. Kal notice aya hai, disconnection ka. Baaki sab thik hai.

Paani roj subah subah mil jaata hai. Jaldi uthke bhar dete hai. Hamare sone ke liye jagah thi na, bus udhar 3 drum laga diye hai. unn 3 drums pe ek gadha lagake main so jaata hoon…badi chain ke neend aati hai. Baaki sab thik hai.

Kal mere padosi ke biwi ka mangalsutra chori ho gaya. Do saal se paise baccha baccha ke kharida tha. Police station waalon ne usko gussa karr diya…Pata nahin kitni choriya ho rahi hai….itna keemti mangalsutra pehenke nikalte kyon ho….Baaki sab theek hai…

Dhanda chal raha hai, kha peeke, Sales tax, building tax, Professional Tax, Income Tax, Service Tax bharne ke baad, aapke sarkaari karmachariyon ke visit ke paise bach jaate hai…. baaki sab theek hai….

Gaon jaane ke liye train ke ticket nikalwane gaya tha….bees minute line main khade rehne ke baad maalum pada ticket nahin hai….line se nikalne ke baad agent ne ticket karwake diye….thode paise jyaada lage…lekin ticket paanch minute main mil gaye…baaki sab theek hai.

Gaon main hamari jameen Dam ke raaste aa rahi hai karke sarkaar humein paise degi aise maalum pada, main sab kagaz leke gaya, lekin mujhe kahan gaya ke kagaz barabar nahin hai… phir gaon ke aadmi ne kuch paise udhar dilwake cheque dilwaya…jitne milne the uske aadhe to mil gaye….baaki sab theek hai….

Ek builder aaya hai, kehta hai paise leke yahaan se jaao, mujhe yahaan tower banana hai. Woh jitne paise de raha hai, utne main to mujhe yahaan kuch milne waala nahin hai…maine usse manna kiya…lekin ab roj gunde bejta hai….police main gaya tha…woh kehte … negotiate karke khatam karr do…hum baat karre kya….baaki sab theek hai…

Bus…aise hi aapke likhne ka mann kiya…Baki sab Theek Hai!!